Foro Budismo Theravada

Colofón

८९१. एत्तावता च –
“सीले पतिट्ठाय नरो सपञ्ञो, चित्तं पञ्ञञ्च भावयं।
आतापी निपको भिक्खु, सो इमं विजटये जट”न्ति॥ –

इमं गाथं निक्खिपित्वा यदवोचुम्ह –
“इमिस्सा दानि गाथाय, कथिताय महेसिना।
वण्णयन्तो यथाभूतं, अत्थं सीलादिभेदनं॥

“सुदुल्लभं लभित्वान, पब्बज्जं जिनसासने।
सीलादिसङ्गहं खेमं, उजुं मग्गं विसुद्धिया॥

“यथाभूतं अजानन्ता, सुद्धिकामापि ये इध।
विसुद्धिं नाधिगच्छन्ति, वायमन्तापि योगिनो॥

“तेसं पामोज्जकरणं, सुविसुद्धविनिच्छयं।
महाविहारवासीनं, देसनानयनिस्सितं॥

“विसुद्धिमग्गं भासिस्सं, तं मे सक्कच्च भासतो।
विसुद्धिकामा सब्बेपि, निसामयथ साधवो”ति॥
स्वायं भासितो होति।

८९२. तत्थ च –
तेसं सीलादिभेदानं, अत्थानं यो विनिच्छयो।
पञ्चन्नम्पि निकायानं, वुत्तो अट्ठकथानये॥

समाहरित्वा तं सब्बं, येभुय्येन सनिच्छयो।
सब्बसङ्करदोसेहि, मुत्तो यस्मा पकासितो॥

तस्मा विसुद्धिकामेहि, सुद्धपञ्ञेहि योगिहि।
विसुद्धिमग्गे एतस्मिं, करणीयोव आदरोति॥

८९३. विभज्जवादिसेट्ठानं , थेरियानं यसस्सिनं।
महाविहारवासीनं, वंसजस्स विभाविनो॥

भदन्तसङ्घपालस्स, सुचिसल्लेखवुत्तिनो।
विनयाचारयुत्तस्स, युत्तस्स पटिपत्तियं॥

खन्तिसोरच्चमेत्तादि-गुणभूसितचेतसो।
अज्झेसनं गहेत्वान, करोन्तेन इमं मया॥

सद्धम्मट्ठितिकामेन , यो पत्तो पुञ्ञसञ्चयो।
तस्स तेजेन सब्बेपि, सुखमेधन्तु पाणिनो॥

८९४.विसुद्धिमग्गो एसो च, अन्तरायं विना इध।
निट्ठितो अट्ठपञ्ञास-भाणवाराय पाळिया॥

यथा तथेव लोकस्स, सब्बे कल्याणनिस्सिता।
अनन्तराया इज्झन्तु, सीघं सीघं मनोरथाति॥

८९५. परम विसुद्ध सद्धा बुद्धि वीरिय पटिमण्डितेन सीलाचारज्जव मद्दवादिगुणसमुदयसमुदितेन सकसमय समयन्तरगहनज्झोगाहणसमत्थेन पञ्ञावेय्यत्तियसमन्नागतेन तिपिटकपरियत्तिभेदे साट्ठकथे सत्थुसासने अप्पटिहतञाणप्पभावेन महावेय्याकरणेन करणसम्पत्तिजनितसुखविनिग्गतमधुरोदारवचनलावण्णयुत्तेन युत्तमुत्तवादिना वादीवरेन महाकविना छळभिञ्ञापटिसम्भिदादि भेदगुणपटिमण्डिते उत्तरिमनुस्सधम्मे अप्पटिहतबुद्धीनं थेरवंसप्पदीपानं थेरानं महाविहारवासीनं वंसालङ्कारभूतेन विपुलविसुद्धबुद्धिना बुद्धघोसोति गरूहि गहितनामधेय्येन थेरेन मुदन्तखेदकवत्तब्बेन कतो विसुद्धिमग्गो नाम।

८९६.ताव तिट्ठतु लोकस्मिं, लोकनित्थरणेसिनं।
दस्सेन्तो कुलपुत्तानं, नयं सीलादिसुद्धिया॥

याव बुद्धोति नामम्पि, सुद्धचित्तस्स तादिनो।
लोकम्हि लोकजेट्ठस्स, पवत्तति महेसिनोति॥

इति साधुजनपामोज्जत्थाय कता विसुद्धिमग्गकथा,
पाळिगणनाय पन सा अट्ठपञ्ञासभाणवारा होतीति।

विसुद्धिमग्गपकरणं निट्ठितं।
Mahā Vihāra. Sri Lanka. B.Buddhaghosa (escrito correctamente ahora el nombre del Venerable: no Buddhagosha, sorry!)

Tipitaka.app es un software gratuito construido y distribuido como una donación de Dhamma. Siempre será gratis y propiedad del Mundo Budista.Textos de Chaṭṭha ​​Saṅgāyana Pāḷi Tipiṭaka obtenidos con permiso de www.tipitaka.org (VRI) el 2018-09-01. Copyright Instituto de Investigación Vipassana.
Información adicional sobre Tamil-Nadu: [/quote]
Mahā Karuṇā
. Saludos, mettā.